CONTORNA
A Contorna de Borbela de Luz
A CONTORNA NATURAL
Borbela de Luz é unha paisaxe. Tradicional, humana e natural a un tempo. Intervida polos traballos agrarios de hai décadas, polo decorrer do río Grañal, polo vello muíño da Xorda e polo inevitable ritmo das árbores, do mato e ata das pedras: nacen, medran, erosiónanse e morren e, nese proceso, van debuxando espazos de beleza e respecto. Nas 4 hectáreas de Borbela hai moitísima vida. Carballos, fentos, silvas, carpazas, toxos, mentas e lavandas forman parte do catálogo vexetal. Os insectos, imprescindibles para a vida, alimentan esta terra con presenza intanxible. O lirismo póñeno merlos, pardaos, paporrubios, pegas, corvos, gaios, rolas… O cuco trae consigo a primavera e o picón fai a súa propia cabana nalgún carballo próximo. As rochas enraizadas e as pedras exiliadas de muros e paredes completan o lenzo.
O Muíño da Borbela forma parte dunha rota de sendeirismo polas beiras do río Grañal. É unha das que se poden desfrutar sen sequera saír do termo municipal de Esgos.
GASTRONOMÍA
Na localidade de Esgos, a apenas 2 Km. de Borbela de Luz, Panadería Agustín ofrece a oportunidade de saborear pan tradicional galego elaborado en forno de leña e as típicas bicas de manteiga, omnipresentes en lugares como Sas de Penelas, Castro Caldelas ou A Pobra de Trives, que celebra no mes de xullo unha festa gastronómica e unha mostra dedicadas a este doce.
As castañas, matrioskas dos soutos que rodean os monumentos monásticos da Ribeira Sacra, son un símbolo da cultura ancestral galega. Elas son a base dos tradicionais Magostos, nos que se degustan castañas asadas e chourizos e se cata o viño caseiro da última vendima. Para coñecer os sabores máis próximos, a cita é o primeiro sábado de agosto na Feira Agroalimentaria do Pinto, a un tiro de pedra de Borbela de Luz.
ENOLOXÍA
A denominación de orixe Ribeira Sacra eleva o nivel para presentarlle ao visitante caldos elaborados en adegas de interesante factura arquitectónica. Poden presumir do chamativo selo de viticultura heroica, gañado a pulso polo cultivo das vides en socalcos que colgan vertixinosamente sobre os cursos fluviais.
> Ribeira Sacra
QUE VISITAR. A RIBEIRA SACRA E MÁIS
MonumentalidadE
O cenobio de San Pedro de Rocas, do século VI, sitúase a uns 5 Km. de Borbela de Luz. É un conxunto eremítico impresionantemente ubicado. Os mosteiros de Santo Estevo de Ribas de Sil, cos seus tres claustros, e o feiticeiro de Santa Cristina inclúense nun itinerario pola Ribeira Sacra que pode descubrirse nun so día ou en toda unha vida: Xunqueira de Espadanedo, Parada do Sil, A Teixeira, Castro Caldelas, Montederramo e a ribeira lucense, na outra beira do río, son convites irrenunciables.
PATRIMONIO NATURAL
Patrimonio natural: O Canón do Sil perfila esa monumentalidade arquitectónica cunha profundidade paisaxística na que o río actúa como imán. Pode descubrirse en catamarán dende o propio curso ou dende os seus numerosos miradoiros, algúns de espectacular deseño.
ARTESANÍA
Xunto a enclaves relevantes en Galicia como Gundivós ou Buño, a olería de Niñodaguia enraíza as terras onde se asenta Borbela de Luz nun pasado etnográfico e protoindustrial que soubo perdurar no tempo. Obradoiros a cargo dos propios cacharreiros e postos de venda a 10 Km. das cabanas permiten descubrilo.
OURENSE CAPITAL
Para as apetencias máis urbanas, a cidade de Ourense conxuga distancias accesibles, un fermoso patrimonio monumental e unha proposta termal que bota raizames na propia orixe da cidade. As augas quentes do seu subsolo son o auténtico tesouro da capital provincial.
> Turismo de Ourense
DEPORTES DE INVERNO
Manzaneda, a única estación de esquí de Galicia, atópase no camiño de Borbela de Luz, pola OU-536, cara ás terras de Valdeorras e O Bierzo. A viaxe é unha oportunidade para coñecer puntos de interese coma Castro Caldelas ou Pobra de Trives, e mantén o seu itinerario sobre elementos milenarios tan simbólicos como a ponte romana do Bibei.
> Estación de Manzaneda
